ስንክልና ምስ ዝህልወካ

ኣብ መዓልታዊ ህይወትካ ዝሕግዝ ብቑዕ ናውቲ ሓገዝን ልምምድን

እቶም ትረኣየሎም ማእከል ክንክን ጥዕና ንኣብነት ከም ሓገዝ እዝኒ ወይ ዓረብያ ስንኩላን ዝኣመሰለ መዓልታዊ ህይወትካ ንኽትኣሊ ዝሕግዝካ ፍሉይ ናውቲ ክትረክብ ክሕግዙኻ ይኽእሉ እዮም። ከምኡ’ውን ንድልየታትካ ኣብ ዝሰማማዕ ልምምዳት ክትሳተፍ ትኽእል ኢኻ።

ምስቶም ትረኣየሎም ማእከል ክንክን ጥዕና ተራኺብካ ብዛዕባ ስንክልናኻ ንገሮም እሞ እንታይ ዓይነት ደገፍ ክትረክብ ከም ትኽእል ክሕብሩኻ ኣዮም።

ንዓኻ ዝሰማማዕ ስራሕ ንምርካብ ሓገዝ ርኸብ

ንስኻ ስንክልና ዘለካ ክትሰርሕ ንኽትኽእል ወይ ንዓኻ ዝሰማማዕ ስራሕ ንኽትረክብ ዝተፈላለየ ዓይነት ደገፍ ክትረክብ ትኽእል ኢኻ። ንኣብነት ካብዞም ዝስዕቡ ሓገዝ ክትረክብ ትኽእል ኢኻ፦

• ናይ ምርኣይ፡ ምስማዕ ወይ ምዝራብ ጸገም ምስ ዝህልወካ፡ ካብ ሓደ ክኢላ
  
• ስራሕ ንምድላይ ዝሕግዝ ሓደ ሰብ፡ ንኣብነት ናይ ስራሕ ምልክታ ንምጽሓፍ
  
• ሓደ ምስ ናይ ስራሕ ቦታ ዘላልየካን ኣብ ስራሕካ ዝሕግዘካን ሰብ።
  

ንዓኻ ዝበቅዕ ሓገዝ ንኽትረክብ ንኣርበትስፎርመድሊን (ቤት ጽሕፈት መራከብቲ ስራሕ) ስንክልና ከም ዘለካ ሓብሮም።

ካብ ቤት ጽሕፈት ካሳ ውሕስነት ክፍሊት ኣመልክት

መዓልታዊ ህይወትካ ንምእላይ ንዘድልየካ ነገራት ዝኸውን ዝተፈላለየ ቍጠባዊ ክፍሊታት ንኽውሃበካ ከተመልክት ትኽእል ኢኻ። ብምኽንያት ስንክልናኻ ክትሰርሕ ዘይትኽእል እንተ ዄንካ፡ ንኽወሃበካ ከተመልክቶ ትኽእል ክፍሊታት እውን ኣሎ።

እቲ ክፍሊታት ንኽወሃበካ ናብ ቤት ጽሕፈት ካሳ ውሕስነት ኢኻ ተመልክት። ኣየኖት ክፍሊታት ክወሃቡኻ ከም ዝኽእሉ ንምፍላጥ ምስ ቤት ጽሕፈት ካሳ ውሕስነት ርክብ ግበር።

ብዛዕባ መሰላትካ ብዝያዳ ኣንብብ

ብዓል መዚ ንተሳትፎ (Myndigheten för delaktighet (MFD)) ንዓኻ ኣብ ሽወደን ሓድሽ ዝኾንካን ስንክልና ዘለካን ዝኸውን ሓበሬታ ዝሓዘ ብሮሹር ኣዳልዩ ኣሎ።

መግለጺ ቃላትን ኣምራትን

ስንክልና

ሓደ ስንክልና ዘለዎ ሰብ፡ ሓደ ተግባራዊ ዓቕሙ ዝነከየን ከም ካልኦት ብተመሳሳሊ መንገዲ ኣብ ሕብረተ ሰብ ንኽሳተፍ ደገፍ ከድልዮ ዝኽእልን ሰብ እዩ። ንስኻ ስንክልና ዘለካ ምስ ስንክልናኻ ዝተወለድካ ወይ ዳሕራይ ኣብ ህይወትካ ዘጋጠመካ ክትከውን ትኽእል ኢኻ። ስንክልና እዚ ዝስዕብ ክኸውን ይኽእል፦

• ኣካላዊ፡ ንኣብነት ክትንቀሳቐስ፡ ክትርኢ ወይ ክትሰምዕ ዘጸግመካ ምስ ዝኸውን
  
• ስነ ኣእምሮኣዊ፡ ንኣብነት ኣእምሮኣዊ ሕማም ምስ ዝህልወካ
  
• ናይ ምሕሳብን ምምርማርን ክእለት፡ ንኣብነት ሓድሽ ነገር ንምርዳእ ወይ ምምሃር ዝያዳ ግዜ ዘድልየካ ምስ ዝኸውን
  
• ልብወታዊ፡ ንኣብነት መምርሒታት ንምኽታል ወይ ግዜኻ ንምምዳብ ደገፍ ምስ ዘድልየካ።
  

ካብዞም ኣብ ላዕሊ ዝተጠቕሱ ንላዕሊ ካልኦት ዓይነት ስንክልና እውን ኣለዉ።

መዓልታዊ ንጥፈታት (Daglig verksamhet)

መዓልታዊ ንጥፈታት ንዓኻ ስንክልና ዘለካን ዘይትሰርሕን ዝኸውን ንጥፈታት እዩ። ነቶም ንጥፈታት ኣብ ሓደ ናይ ስራሕ ቦታ ወይ ሓደ ዳግ ሰንተር (dagcenter) ኢኻ ትሳተፎ። ኣብ ሓደ ናይ ስራሕ ልምምድ ትገብረሉ ቦታ እውን ክኸውን ይኽእል እዩ።